財經評論： 銀行爭住做按揭

近期樓市如天氣乍暖還寒，交投有所回升，造價仍未見上漲，但東亞銀行已急於3月中出手，推低絕全城的H+1.6厘的按揭計劃。不消一周，八間銀行就快馬加鞭跟隨調低按息，加入戰團爭生意。原因無他，經濟前景不明，要趁早掌握時機，交數追quota，況且按揭業務風險低，計掂數有得賺，就一定做。

《蘋果日報》回顧半年前樓市轉差，成交量縮減，按土地註冊處資料顯示，所有樓宇買賣合約數目由去年9月5,467宗，下降至今年2月2,583宗，跌幅超過一半，地產代理叫苦連天，銀行亦不好景。

買賣少，按揭自然少，但銀行按揭部門每年都會制訂生意額，年頭就向目標進發，年尾超標最理想，超標不成，起碼要達標，否則影響業績下跌，難向股東交代。然而，1及2月市況慘淡，成交少得可憐，按揭拍烏蠅，事到如今，不得不急起直追。

3月有多個新盤出籠，如元朗映御、娉廷及朗屏8號，馬鞍山迎海．御峰、將軍澳海天晉、何文田君柏、One Homantin及天鑄2期等等新盤亦加入戰團。上車盤至豪宅大戶式式俱備，可吸引一批鍾情新樓的買家入市，同時意味銀行有按揭生意做，大行細行勢爭崩頭，搶得幾多得幾多，你減按息，我照跟，唔通放軟手腳，仲等？

銀行博到盡爭生意，出於按揭業務夠穩陣，借貸成數不高，自住物業價值1,000万元以下借六至七成，當中700万至1,000万元只可借六成，並設上限500万元，物業價值1,000万元以上借五成。換言之楼价起碼跌一半，才出現資不抵債的情況。試問楼价跌一半，絕非一時三刻的事，搶到手的按揭生意，不會很快變負資產。即使債仔斷供，由銀行收樓賣出去，仍然有揸拿，不會蝕大本。至於非住宅物業寫字樓、商舖、工廈及車位等，按揭成數不可超過四成，同屬低風險，銀行怎會不做生意呢！

原文連結：http://hk.apple.nextmedia.com/financeestate/art/20160329/19547850